我的解難之道

朋友話覺得我好似無煩惱咁，每次見面都嘻嘻哈哈講粗口講低B嘢，又或者靜靜地做樹窿聽朋友呻，但就好少聽到我訴苦。

其實作為一個凡人，點會無煩惱？只不過，相比起怨天尤人或成日把煩惱掛嘴邊，我更習慣遇到問題時講句粗口，然後快快脆解決咗佢。

煩惱分好多種，有啲可以自行解決；有啲要搵人幫手；有啲係無得解決；有啲根本唔需要解決。

咁除咗搵人幫拖有需要同人講之外，其餘三種係講嚟都無用。可以自行解決的，通常我都可以好快解決到。就算無得解決的，從命理或占卜上亦大約可以知道點去處理和調整心態。經過咁多年的浸淫，已經可以睇到事情背後的祝福或課題，問題的重點好多時不在於解決，而在於領悟、學習和轉化。

有啲煩惱，根本唔需要攞嚟煩。人好多時覺得苦惱，係因為我哋以為所有問題都可以「被解決」。但原來世間上好多嘢，都唔係人可以控制到。例如幾時遇到真命天子哩啲…唔係你日日去聚會識男仔就可以搵到。

又有啲煩惱，係源於欲望太多，太貪心，想達到某種成就、想得到某啲東西、想過某種生活……世事豈會盡如人意，求不得之苦，真是常態。想得到的越多，煩惱就越多。好多時我哋以為人生一定要有o既事情，例如婚姻、家庭、財富、成就、子女……當你千辛萬苦得到了，才發現自己失去的更多，又或根本唔係自己想像的那般美好。

不過我都鼓勵大家有煩惱可以share，始終講出嚟，情緒可以疏導之餘，或者都可以從朋友那裡獲得提點、啟發，都係好o既~ 只要唔係次次見面都呻就OK啦！

我呢~ 遇到有事情解決唔到，就會先丟埋一邊。有時情況未必係自己想像中咁壞，但當你不斷loop住件事，只會鑽牛角尖，諗唔到方法之餘仲搞到身心俱疲做錯更多決定。尤其是當個問題的出現只不過係因為行衰運，就更加唔駛咁上心。瞓咗佢，等個衰運一過，好多嘢就自然應刃而解。

依家遇到問題，只要好好喊一場、食餐好、同朋友玩餐飽、或者對住啲動植物，就自然平衡返。而我發現，無嘢比學識「臣服於當下」更有力量，更能化解煩惱。當然，「臣服」唔係咁易學得識，當中又係另一門學問，有機會再講。

識同個宇宙connect的好處係，你會feel到個宇宙無時無刻都backup住你，其實仲有乜需要擔心呢？