別讓自己淪為情緒垃圾站

好多作為心理/心靈治療師或諮商師的朋友，或許都有過以下遭遇︰朋友每次見面都向你吐一大堆苦水，八成時間都係對方在放負，然後期望你俾建議甚至提供免費服務。更甚者，當你意識到自己成為咗對方的情緒垃圾站、工具人，於是開始淡出和保持距離，卻被對方在背後搞小動作、抹黑你。

好多人認為做治療師「唔駛本」，就算提供免費服務都無損失。何況大家朋友，聆聽下俾下意見都係人之常情，何必咁計較？

首先我想講，成為一個真正的治療師(唔計神棍類)，係要成本的！以我為例，花了超過六位數字去進修各種專業知識，花咗超過十年時間去研習和儲經驗，哩啲唔係成本？

其次，每次見面接收的負能量、情緒垃圾，都會影響到治療師本身的能量水平。放負者吐完糟之後當然覺得輕鬆晒，可以拍拍囉柚就走，但接收者就的能量就會被拉低，見完面之後都身心俱疲，要花一輪功夫去平衡返。

我哋去朋友開的餐廳，都唔會唔俾錢食霸王餐~ 朋友俾個折頭你或請你食多一兩碟，係人情，但都唔係老奉。我唔明點解要朋友俾專業意見自己，會期望對方free俾你？

講真間中一次半次都無所謂，但次次係咁，就係存心搵人著數，哩啲唔會係朋友所為。

可能有啲朋友唔覺自己在放負，只係分享自己，不如咁，下次試下錄音，數下自己發言時間佔咗幾多比例，又計下當中有幾多成係講負面嘢？我可以好肯定咁講，一定超過七成或以上都係自己不停咁講講講……

做朋友要交流，但交流唔可以係單向式的。對方一味聽，你一味講，咁唔係交流，咁只係你需要有人聽你o既「偉論」或做你o既應聲蟲。

但都無所謂，因為有啲人真係唔介意齋聽。但若對方係專業的，而你又想攞專業意見，麻煩都係book個時間，俾錢啦！