如何能成為身心靈治療師？

時不時有人問我，要點先可以成為身心靈治療師？

而通常，我會反問對方以下問題︰

1. 除了專業治療知識及技巧之外，你認為你還具備什麼能力去療癒別人？
2. 你認為客人可以從你的內在得到怎樣的啟發與療癒？
3. 你的能量、體力、心靈力量足夠強大？強大到即使每天接收源源不絕的負能量，依然不受影響？
4. 你想成為治療師的最終意圖是什麼？這個目的一定要成為治療師才可以達到？
5. 你覺得你的"道行"和"智慧"，能療癒自己之餘，也足夠療癒別人？

要成為一個身心靈治療師，好多人以為讀個課程考張證書，或跟個身心靈導師學道，開個page掛個牌就是了。無錯，從知識和技巧層面而言，因為從來沒有專業監察制度，你就算話自己係佛陀轉世、識72變，只要一日有班慌失失o既迷途羔羊肯信你，一日唔會話無生意。

好多人想成為療癒者，可能係出於好意，覺得自己跨越咗某啲人生關口，被療癒了，想把哩種感動帶畀別人。又或者覺得係一份使命，希望世人從自己身上獲得療癒。

更甚者，覺得哩個角色能讓自己感覺偉大、有價值、有優越感、有權威感，覺得自己是身懷天命的外星使者、高維度靈魂、人間天使等等……目的係嚟地球拯救世人。(哩項最少人會承認但又係佔咗大多數)

不過，身心靈工作同其他行業唔同o既係，你個"boss"唔係你啲客，而係"宇宙"(或所謂的神)。你要向邊個交待？絕對唔係「對自己有交待」就夠。

唔理你個intention係乜，有幾崇高幾偉大都好，若然你道行唔夠、能力不足、胡亂吹虛、心術不正…令人遍離正道，甚至因你的失德受到傷害，哩個惡業，係由你去承擔的！

好多能力欠奉、不專業或失德的身心靈工作者，都做到一身灰氣。最普遍的，係那些自身力量已經不夠強，還經常接觸客人的負能量，以致經常身體不適，又或者長時間行衰運。有啲人會話哩啲係生命的考驗和修行，但事實是，自己造成o既業。

其實要成為真正o既身心靈治療師或工作者，真係唔到你話事。一切，都係由個宇宙去安排。

不過有樣嘢大家可以思考下︰個天如果要預備一個人去療癒世人，佢會點安排哩個人o既人生？一定唔會係順風順水，無災無難的人生啊！以我自己為例，係天生一手爛牌、長期赤貧兼極度受傷o既人生(當然我唔會周圍同人講我經歷過啲乜去證明自己)。而重點係，成為治療師之前，哩啲課題都必需先被療癒。同時，唔可以能醫不自醫。自己都未搞得掂，點去幫人？

另一樣，就係個人本質。以我觀察所得，一個稱職o既身心靈治療師，必須聰明、感覺敏銳和慾望低。一個慾望重、貪心o既人，一定唔會係好o既工作者。慾望唔單係物慾，更重要係權威和優越所帶來的那種想被莫拜想當上師o既慾望。

聰明有智慧也是必須的。先唔好講要識得分身心靈資訊o既真假，或學習專業知識o既能力。身心靈工作要面對o既，不單單是人，而是人性裡頭各種不同的心魔。你要與客人的魔對抗，也要與自己的魔共處，無人係完全無魔性的，你見唔到自己有，一係你悟性低，一係你自己都著咗魔。

感覺敏銳除咗講緊你收唔收到宇宙o既訊息、靈感，又或者感應到其他人o既能量、情緒等等……最重要係對自己內在o既覺察︰一個念頭、一句說話、一個身體反應，你能唔能夠睇到、feel到自己入面發生咩事；你個ego玩緊咩把戲；你真正o既intention係乜；你恐懼緊啲乜……要敏感，頂輪和眉心輪必須開放，有好多工作者(包括本人)甚至出現頂輪過度活躍o既情況，即係你條天線過度敏銳，副作用就係個腦停唔到、多夢、瞓得差，甚至出現精神問題。

要成為身心靈治療者，並唔係想像中咁夢幻，咁簡單。無論物質、生活、人生、能量上都要付出代價。無論個初心幾正確幾善意都好，能力不足、悟性不高、條命唔夠強o既人，我會勸佢顧好自己先。真的，唔為個世界帶嚟負擔，其實已經功德無量。(合十)

文︰孫子然 fairy’s Jenny